Argazki erakusketa, Udal Artxiboak antolatua, Aroztegi aretoan urriaren 9tik 25era.
Erakusketa honetan, 60ko hamarkadan gure herria irudikatu nahi izan dugu; garai hartako Bergarako herritarren egunerokotasuna azaldu. Hirurogeiko hamarkada, zentzu askotan, aldaketa garaia izan zen; eta argazki hauen bidez gizarte horren zertzelada bat eman nahi izan dugu.
Bergarako aisialdian zinema eta kirol-ikuskizunak nabarmentzen dira. Hemen pilota, txirrindularitza, futbola, ziklo-krosa ikus daitezke, baina, horrez gain, mendi irteerak, musika taldeetan parte hartzea, igandeko dantzak...
Hirigintza-aldaketen garaia da. Alde batetik, industria berriak sortu ziren; aurreko ehun-fabrikez eta Cerrajeraz gain, beste sektore batzuetako fabrikak ugaritu ziren, eta horietako asko San Lorenzo industrialdean ezarri ziren. Bestetik, etxebizitza asko eraiki ziren, hala nola Fraiskozuri plazan, Irala Jaunaren kalean, Zabalotegin, Irizar pasealekuan, Matxiategin. Izan ere, lehen zegoen etxebizitza kopurua txiki geratu zen, eta, gainera, emakumeek ez zuten garai hartan eskatzen zen erosotasun maila betetzen.
Erlijioak eta elizak garrantzi handia zuten. Bataioak, jaunartzeak, ezkontzak eta hiletak alde batera utzita, edozein denda, tailer edo ospakizunetan bedeinkazioa egiten zen beti. Hezkuntzan ere, bi ikastetxe handienak -Mariaren Konpainia eta Seminarioa- mojek eta fraideek zuzentzen dituzte.
Erakusketa honetako argazki guztiak Udal Artxibokoak dira. Artxiboan gordetzen eta kudeatzen ditugun funtsak herritarrei ezagutarazteko modu bat da. Aroztegi aretoak aukera paregabea eskaintzen digu horretarako, baina aukeraketa lan bat egin behar izan dugu milaka argazkiren artean. Ez da lan erraza izan, baina espero dugu zuen gustukoa izatea.
